दशैंको फूलपातिबाट रिलिजमा आउने पक्का भएको फिल्म ‘हरिबहादुरको जुत्ता’को टिमले प्रचार आरम्भ गरेको छ । फिल्मको फस्टलुक सार्वजनिक गर्दै दीपेन्द्र के खनालको निर्देशनमा बनेको फिल्मको प्रचार आरम्भ गरिएको हो ।
सार्वजनिक पोस्टरमा फिल्मका मुख्य कलाकार हरिवंश आचार्य मात्र छन् । पोस्टरबाट उनको क्यारेक्टरलाई स्पष्ट पार्ने कोशिश निर्माणपक्षले गरेको छ । हरिबहादुर नेपाली टेलिभिजनको दुनियाँमा रुचाइएको पात्र हो ।
पोस्टरमा पनि सोही झल्को दिइएको छ । फिल्ममा हरिवंश आचार्यको साथमा स्वस्तिमा खड्का, प्रकाश सपुत, प्रियंका कार्की, हरिहर शर्मा, दिव्य देव, किरण केसी, राजाराम पौडेल, दिनेश काफ्ले, कमलमणि नेपाल लगायतका कलाकारहरूको अभिनय छ ।
असोज १३ गतेबाट रिलिजमा आउने यो फिल्मलाई एमएस मोसन पिक्चर्सको व्यानरमा निर्माण गरिएको हो । सरोज ओली र मोहितबंश आचार्य निर्माता रहेको फिल्ममा कृष्णबहादुर थापाको छायांकन, नकुल खड्काको सम्पादन छ । फिल्ममा वसन्त सापकोटा, दीपक शर्मा र प्रकाश सपुतको संगीत सुन्न सकिनेछ ।